Валентина Чичамкина: «Эи ведсь максси тейне эрьгя» ❄❄❄❄❄
Мезе шары прясот, мзярда ванат ломанть лангс, кона тялонь кельме шиня апак пельхть каряньфни и чопафни цят кельме анцемати. Абондома, дивандама, нльне сельмонь каяма. Вдь аф сембонди тяфта сафтови. Кие-бди шаманцка кельмаза ведьса аф шташендсы, а тяса, эрька, эи ведти сувак! И улихть вдь ётксонк кеме седи ломатть, конат апак пельхть тиендьсазь тянь. Ётксост аф кржа авадовок. Тячи содафттядязь фкя тяфтама «моржавать» мархта.
Валентина Николаевна Чичамкинась эряй и покоди Саранскяйса. Весяла, мазы, отькорь тя авась Мордовия Республикань ВОСВОД-онь президиумонь член, эсь кизосонза «моршнень» ёткса тялонь уендемать коряс республикань чемпион.
Шачсь Валентина Николаевна Тульскяй областень Кимовск ошса. Но родинакс эстеенза лувондсы Мордовиять. Тястонне, Кочкуровскяй райононь Сабаево велеста, сонь тядяц. И тяса, мокшэрзянь масторса, сон сонцьке эряй вов ни лама киза. Шабакс пингоц авать ётась Узбекистанца, Учкудук ошса, коза тядянза-алянза прважафтольхть покодема комсомольскяй путёвкас коре. Тоса стирнясь и кармась кельгомонза ведть.
—Идень садикса, коза мон якань, ульсь панжада менель ала бассейна. Минь тоза вятнемазь шити колмоксть. И сяс мес ся масторса лацонк тяла аф уленди, бассейнаса минь уендеме пцтай кизоньберьф. Мзярда молень тонафнема васенце классу, школаса кочксесть ломатть профессиональнай уендиень секцияти. Монга повонь спортсменонь командати. Вов тяфта ушедсь спортть мархта ладямазе,—лятфни Валентина Чичамкина.
90-це кизотнень ушетксста стирсь семьянц мархта ётась эряма Мордовияв. И тяса сон васенцеда кульсь сире койть, Кльхчяняста анцемати сувсемать колга. Тя пяк дивандафтозе лямбе ширдень эряйть, и сонь мялецоль няемс чопафнемать эсь сельмосонза, а тоса и варжамс эстеензовок.
—Мон, улема, вестевок аф юкстаса сянь, мезе марянь васенцеда эи ведти чопафтомстон. Ронгозе эсток вельф пяшкодсь эрьгада, санган бта тол ётась. Вийда эсон эвондась сняра, тейне-арам, улель инголен панда, сяньге шашфтолине вастстонза,—азозе авась.
Шарьхкотьф, кда ни тяшкава тусь мялезонза кельме ведьса уендемась, сон тянь кармась оцю мяльса тиендемонза сяда товга. Лувондсь моржеваниять колга информацият, сёрматфтсь пря «Шумбрашинь группати», кона покодсь ошса. Моржеваниять мархта Валентина Николаевна аф явонды колмогемонь киза ни. Чопафнесь эи ведти нльне пекиста.
—Омбоце стирезти пекиста улемста мекольцеда эшелянь кафта недяляда шачемдонза инголе,—пеедезь азозе тядясь.—И стирневок эсь лацон тусть, кемокснесазь ронгснон, чопафнихть кельме ведти. Тяни уноконяневок арьсекшнихть тумс киган. Фкять мархта баняса парьсемста фалу валонттама кельме ведьса и лисенттяма ловть лангс. А теенза нинге аньцек кота кизонят!
Валентина Чичамкинать валонзон коряс, республикасонк сатомшка лама ломаньда, конат вов тяфта, кельмода апак пельхть, уендихть эи ведьса. Пялькстоматнень эса, конатнень ётафнесазь Мордовиянь ВОСВОД-сь и МЧС-сь, участия примсихть аф сембе. Ламонцне, кода Саранскяень эряй «моршнень» ёткста, стане и райононнетнень, тиендьсазь тянь аф пьедесталса васттнень инкса, а сянкса, штоба петемс эсь мяльснон и кемокстамс шумбрашиснон. Саранскяйса фалу ули кода чопафнемс «Старт» стадионть видеса водоёмти. Тяса ётафневихть «моршнень» сембе пялькстомасна. Мекольцесь ульсь аф кунара, 26 февральста. Сон лемтьфоль Отечествань Аралаень шити и Авань Международнай шити. Эсонза примась участия нильгемоньда лама ломань. Республикань эряйда башка ульсть «моршт» Пензаста и Арзамасста. Тяфтама уендематнень ванома сашенды сатомшка лама ломань. Пингонь ётазь кой-кит ня «болельщикнень» эзда синцьке шоворькшнихть «моршнень» ёткс.
Аф ваномок сянь лангс, што кельме ведьса уендемафтома Валентина Николаевна эряфонц аф няйсы, лиятненди пильгонь-прянь синдезь чопафнемс анцематненди авась аф мярьгонди. Тяса эрь ломанти ванома васендакиге эсь шумбрашинц лангс. Сембе ширде шарьхкодема, мезсь ладяй тейть, а мезсь—аф. Кинди-бди сатомшка штамс кельмаза ведьса душса, кинди-бди кирдеви ульцяса кельме ведьса валондомась, а вов инь кемотненди ули кода анцемаска чопафтомс. Эряскодомась цебяренди аф вяти. Ули кода гастямс шумбрашить сембе пингс.
Сонць Валентина Чичамкинась прянц спортсменкакс аф лувондсы. Кельме ведьса уендемась—тя кельгома тевоц.
—Уленди, ломаттнень ронгсна лажады баняти, китнема мянь сявсы. А мон тяфта анцемати лажаткшнян. Кой-коста сяшкава чопафтомазе сай, валса аф азови. Республикасонк сатомшка вастта, коса сембось тиф цебярьста эшеляманди. Ули тяфтама Сабаево веленьконь маласовок. Мон сидеста тоза яксян. и кизонда, и тялонда—сетьмофнеса кельме ведняти лажатфозень. И тядянь масторса шави лихтибрятне макссихть тейне вийхть и эрьгат сяда товолдонь тевненди, казендихть цебярь настроения. И мон тага анокан молемс эряфть эзга и аф макссемс пря эрь шинь оцю и ёмла пичефксненди и прябалатненди.
Марина Стешина.
